သူငယ်ချင်းတွေ (၄)

ကျွန်တော့အခေါ် = မောင်သက်
ချစ်စနိုးအခေါ် = မသာလေး၊ သားလေး
စတင် ပေါင်းသင်းသည့် ခုနှစ် = ၁၉၉၅ ခုနှစ်
ထူးခြားချက် = ဂစ်တာတီးကောင်းသည်၊ ပါးစပ်မှ အသံမျိုးစုံထွက်သည်၊ အသဲငယ်သည်။
အလုပ်အကိုင် = Guitarist


မောင်သက်တဲ့ ဂစ်တာကို ဒေါင်ဒေါင်ဒင်ဒင် တီးရုံတင်မဟုတ်ဘူး ပါးစပ်ကပါ တီးလုံးတွေကို ရွတ်နေတတ်တဲ့ သတ္တ၀ါပေါ့။ ကျွန်တော်နဲ့ ဒီကောင်က ရွယ်တူပေါ့။ ကျောင်းမှာ ၇ တန်းနှစ်တုန်းက တစ်ခန်းထဲရယ်။ အဲဒီ့တုန်းက ဒီကောင့်နားသွားရင် အချိန်ပြည့် ပါးစပ်က တီးလုံးတွေ ထွက်လို့ တော်ရုံတန်ရုံကောင် မခံနိုင်ဘူး။ ကံဆိုးချင်တော့ ကျွန်တော်က ဒီကောင့် အနောက်မှာ ထိုင်နေရတာ။ လူပုံက ဖြူဖြူ ၀၀ လေး။ ကွန်ပါဗူးကို ကိုင်ပြီး ပါးစပ်ကနေ ဂစ်တာတီးနေတာ။ သူ့ကို ကျွန်တော်က ဒီကောင်ဘာလဲ မသိဘူးလို့ တွေးမိသေးတယ်။ နောက်နေ့မှ သိတာ ဒီကောင်က အိမ်မှာ ဆရာခေါ်ပြီး ဂစ်တာတီး သင်နေတာကိုး။ ၀ါသနာ ပါသလား မပါသလား မမေးနဲ့ မုန့်ဖိုးစုပြီး ဂစ်တာပဲ ထိုင်ဝယ်နေတဲ့ ကောင်မျိုးပေါ့။ ဒီကောင်နဲ့ကတော့ ငယ်ငယ်က ဒီလိုပါပဲ မပေါင်းဘူးလည်း မဟုတ်ဘူး ပေါင်းတယ်လည်း မဟုတ်ဘူး ဘာသိဘာသာ နေဖြစ်တယ်။ အဲ စုံပြီဆိုရင်တော့ ဂီတအကြောင်းလေး ဘာလေးပြောပေါ့လေ။ ခင်တာကတော့ ခင်ပါတယ်။ ကျွန်တော်တို့ ဆယ်တန်းဖြေပြီးတဲ့ အချိန်မှ ဒင်းနဲ့ ပိုတွဲဖြစ်တာ။ တွဲဖြစ်ပုံကလည်း အခွေတစ်ခွေ လုပ်ရာက စတာပါပဲ။

အဲဒီ့အချိန်က ကျွန်တော်နဲ့ ဒီကောင် အပြင်က စတိတ်ရှိုးတွေမှာ စုံဖြစ်တယ်။ ဟိုပြော ဒီပြောပေါ့။ နောက်ပိုင်းကျတော့ ကျွန်တော်က လက်ယားပြီး သီချင်းလေး မတောက်တခေါက်ရေး ရေးပြီးတော့ အသံသွင်းချင်လာရော နှိပ်စက်စရာဆိုလို့ ဒင်းကိုပဲ မြင်တာကိုး။ လှမ်းပြော ငါ့ကို ဂစ်တာ တီးပေးစမ်းပါပေါ့။ ဟိုကောင်က အစကတော့ နဲနဲ အင်တင်တင် နောက်တော့ အေးကွာ ချ လုပ်တာပေါ့ဆိုပြီး တီးပေးတယ်။ စတူဒီယိုတွေက သူနဲ့ သိပြီးသား ဆိုတော့ သူပဲ ခေါ်သွားတယ်။ အဲဒါနဲ့ အသံသွင်းဖြစ်သွားတာပေါ့ဗျာ ငယ်ငယ်က နားငြီးတယ်လို့ ထင်ရတဲ့ ကောင်က ဒီလိုကျတော့ စွမ်းတယ်ဗျ။ ဒီကောင်က ကွန်ပျူတာ တက္ကသိုလ်တက်တယ် ငသော်နဲ့လည်း ခင်တော့ ပိုတွဲဖြစ်သွားတာပေါ့ဗျာ။ မောင်သက်က ကျွန်တော့် ဒုက္ခ အတော်ခံရှာပါတယ် ခုထိလည်း တခါတခါ ခံရတုန်း။ စတူဒီယိုမှာ အသံသွင်းတုန်းကလည်း သူ့ကားနဲ့ လာကြို ပြန်ပို့ ထမင်းလည်း ၀ယ်ကျွေးသေးတယ် ငယ်ငယ်က ကပ်စီးနည်းတယ်ထင်တာ ဒီကောင့်ကို တကယ်တော့ နည်းဘူးဗျ သဘောကောင်းသား။ စတူဒီယိုမှာလည်း ဒီကောင်နဲ့ ကျွန်တော် ခဏခဏ ရန်ဖြစ်နေကျလေ။ ဟိုလိုတီး ဒီလိုတီး ဆိုပြီး ကျွန်တော်က ဆရာလုပ် ဒီကောင်က ပြန်ပြော တိုင်ပတ်တာပေါ့ဗျာ။ သီချင်းဆိုရင် ဒီကောင်က ဒီလိုဆို ဟိုလိုဆို ဆိုတော့ ကျွန်တော်က ပြန်အော် ရန်ဖြစ်ကြတာပေါ့ စကားများတာပေါ့။ ဒါပေမယ့် ၁၅ မိနစ်ပါပဲ ပြီးတော့လည်း ပြီးသွားတာပဲ။ မခေါ်ပဲလည်း နေနိုင်ကြတာမှ မဟုတ်တာ။ ဒီကောင်နဲ့ ကျွန်တော် တွဲဖြစ်တဲ့ အကြောင်းအရင်း တစ်ခုကလည်း ထုံးစံအတိုင်းပေါ့ အရင် ကောင်တွေအတိုင်းပဲ သောက်ကြသည်ပေါ့။ မောင်သက်လည်း ကြွက်တွင်းပဲ အင်း ကြွက်တွင်းကတောင် သူ့လောက်နက်မယ် မထင်ဘူး။ ခုတော့ ပြောတယ် ငါလစ်မစ်ကျနေတယ်တဲ့ ဒါက ပြောနေကြစကား အရက်မ၀င်ခင် :D

မောင်သက်ဆိုတဲ့ကောင် ဂီတကို ဘယ်လောက် မြတ်နိုးသလဲ ရူးသလဲဆိုရင် သူ့အိမ်မှာ ဂစ်တာတွေချည်းပဲ အလက် ၂၀ နီးပါး တွေ့ဖူးတယ်။ အပျက်တွေရော အကောင်းတွေရော Electric တွေရော Accostic တွေရောပေါ့ စုံတကာစိနေတာပဲ။ ဒါတင်ပဲလား မဟုတ်ဘူးဗျို့ Drum Set တစ်ခု ရှိသေးတယ် နောက်တော့ ရောင်းလိုက်တယ်ထင်တယ်။ Drum လဲ တီးတတ်သေးတယ်။ စတူဒီယိုမှာ ကျွန်တော်တို့ သီချင်းတွေ သွင်းတော့ သူက Drummer တွေကို ပါးစပ်နဲ့ တီးပြသေးတာ အဲဒီ့လို လိုချင်တယ် ဘာညာပေါ့။ ဟိုကလည်း သူပြောသမျှ တီးပေးတာပဲ။ ဒီကောင်က လူချစ်လူခင်တော့ အင်မတန်ကို ပေါများတယ်။ တွေ့တဲ့သူတိုင်းက သူ့ကို ခင်ကြချစ်ကြတယ်။ သဘောလဲ ကောင်းတာကိုး စကားပြောရင်လည်း အသံက အကျယ်ကြီး တခါတခါ ရယ်လိုက်ရင် မရပ်တော့ဘူး အော်ပြီးရယ်တာ ဒီကောင်က။ သီချင်းတွေကို သူ့ပါးစပ်ကနေပြီး ပေါက်ကရ စာသားတွေနဲ့ ဆိုပြတတ်သေးတယ် အဲဒါကြောင့် မောင်သက်လာရင် ကျွန်တော်တို့ ပါးစပ်မပိတ်ရဘူး ဟီးဟီး ဟားဟား ပြောလိုက် နောက်လိုက် ရယ်လိုက်နဲ့ ပျော်စရာတော့ အကောင်းသားပဲ။ မောင်သက်က လွန်ခဲ့တဲ့ ၄ နှစ်လောက်မှာ သူ့မိသားစုနဲ့ အတူ အမေရိကားကို ဒိုးသွားပါလေရောလား။ ကျွန်တော်တို့မှာ ပျင်းပြီး ကျန်ခဲ့တာပေါ့။ သူက တစ်ဦးတည်းသောသားလေ အိမ်ကလည်း အလိုလိုက်ထားတယ် ဒါပေမယ့် ဒီကောင်က မဆိုးပါဘူး လိမ္မာတယ် ဆိုရမှာပေါ့ သောက်တတ်တာလေး တစ်ခုကလွဲရင်။ ဒါကလည်း တရားဝင်သောက်တာပါ သူ့အိမ်မှာလည်း ကျွန်တော်တို့ သွားသောက်တာပဲ သူ့အဖေနဲ့ အမေကလည်း သဘောကောင်းတယ် သူ့အဖေက သူ့ပုလင်းတွေ ထုတ်ပေးတယ် သူ့အမေကလည်း စားစရာ အစုံလုပ်ပေးတယ်။ သူ့အမေကြော်ပေးတဲ့ ခေါက်ဆွဲကြော်ရယ် ဟင်းချိုရယ် ဒီနေ့ထိ ကျွန်တော်သတိရသေးတယ်။ ဒီကောင် အမေရိကားကို သွားတော့ ပြန်မလာတော့ဘူး ကျွန်တော်တို့ မတွဲဖြစ်တော့ဘူးလို့ ခင်ဗျားတို့ ထင်သလား။ ပိုတောင် တွဲဖြစ်သွားသေးတယ်။ ဒီလိုဗျ ဒီကောင်က မြန်မာနိုင်ငံကို ၆ လ တစ်ကြိမ်ပြန်လာတယ်။ ပြောတာကတော့ သူငယ်ချင်းတွေကို လွမ်းတယ်ဆိုပဲ။ တခြားဟာလေးတွေလဲ ရှိတာပေါ့လေ ဒါတော့ မပြောတော့ ပါဘူး ခုလောက် ရေးတာတောင် ဆဲနေပြီ :D

မောင်သက် ပြန်ရောက်လာတဲ့ နေ့တွေဆိုရင် ကျွန်တော်တို့ ပွဲတော်ကြီးပေါ့။ လေယဉ်ကွင်းကသွားခေါ် အိမ်ကို ခဏ၀င် အထုပ်တွေချ ပြီးရင် ဆိုင်တစ်ဆိုင်ကို ဒိုး သောက် ပြီးမှပြန်။ နောက်ရက်တွေလည်း တစ်ယောက်နဲ့ တစ်ယောက် ပတ်ပြီးချိန်း သောက်မယ် ဟိုကောင့်ခေါ်အုံး ဒီကောင့်ခေါ်အုံး ဒီလိုမျိုးလေ။ လူစုံလို့ကတော့ ဆိုင်ကိုချီတက်တော့တာပဲ။ မသောက်ခင်တော့ မောင်သက်က အမြဲပြောတယ် ငါအစာအိမ်ရှိတယ် သိပ်သောက်လို့ မဖြစ်တော့ဘူး အရင်လို မသောက်နိုင်တော့ဘူးတဲ့ ကျွန်တော်တို့ကလည်း အေး လူတိုင်း အစာအိမ်ရှိတယ်လို့ ပြန်ပြော ပြီးတော့လည်း သောက်တာပါပဲ။ အလကားပါ ဒီကောင် လျှောက်ပြောတာ တကယ်သောက်တော့ သူချည်းပဲ။ ဘီယာသောက်ရင်တောင် သူက ကျွန်တော့်ကို မင်းကလဲ အပြင်းကစ်စမ်းပါ ဘာညာနဲ့ အပြင်းသောက်ရင် သူက ရေမရောဘူး ရေခဲနဲ့ On The Rock ဆော်တော့တာ။ ဒီကောင် အရက်သောက်ရင် ဟင်းချို တစ်ခွက်ပါမှ သောက်တတ်တယ်။ ဒီကောင်လုပ်လို့ ကျွန်တော်နဲ့ ငသော်လည်း ဟင်းချိုပါမှ အရက်သောက်တတ်တော့တယ်။ မောင်သက်က ဆေးလိပ်တော့ မသောက်ဘူး ဒါပေမယ့် တခါတလေ ကျွန်တော့်ဆီက ဆေးလိပ်ကို နဲနဲတိုက်ဆိုပြီးတော့ ယူသောက်တတ်တယ်။ ဒီကောင် ရုပ်ပျက်ဆင်းပျက်မူးတာ ရှားတယ်။ သူက ကျန်တဲ့ကောင်တွေကို ပြန်ပြီး ထိန်းတာများတယ်။ တခါကတော့ သူမူးတာ ကားပေါ်ကို ချီပြီးတင်ရတယ်။ လျှောက်သွားတော့ ကားပေါ်မှာ အိပ်ပြီးကျန်ခဲ့တယ် ကျွန်တော်တို့က စိတ်မချလို့ သူ့ကို တွဲပြီး ခေါ်သွားတော့ လဒက လူတွေပေါ်မှာ အိပ်နေတယ်။ ရှားပါတယ် မောင်သက်မူးလွန်းလို့ တွဲပို့ရတယ်ဆိုတာ ပြောပြီးပါရောလား ကြွက်တွင်းလို့။ တခါကလည်း ကျွန်တော်လက်ဆောင်ရတဲ့ တရုတ်အရက် ဆေးမြစ်တွေ စိမ်ထားတာ တရုတ်တွေ အပြောကတော့ သိပ်ကောင်းတယ်တဲ့ ဈေးလည်း ကြီးတယ်တဲ့ ကျွန်တော်လည်း လက်ဆောင်ရတာဆိုတော့ မောင်သက်ကို တွယ်မလား ဟေ့ကောင် ငါတော့ မသောက်ဖူးသေးဘူး ဆေးအရက်လို့ ပြောတာပဲ ဆိုတော့ ဒင်းက တွယ်တာပေါ့ကွာ ဆိုပြီး ပြောတယ် အဲဒါ အိမ်ကနေ ကျွန်တော် ထွက်ခါနီး ကျွန်တော့် အဖေက Gin တစ်ပုလင်း ထပ်ပေးလိုက်တယ် ကျွန်တော်က မယူတော့ပါဘူး အဖေရာဆိုတော့ အဖေက ယူသွားပါတဲ့ မင်းတို့ ကောင်တွေ ဒါနဲ့ လောက်မှာ မဟုတ်ဘူးတဲ့ ဒါနဲ့ ကျွန်တော်လည်း ယူသွားတာပေါ့။ မောင်သက်က ပုလင်း ၂ လုံးတွေ့တော့ မင်းက လောဘကြီးတယ်တဲ့ ကျွန်တော်လည်း ဆိုင်ရောက်တော့ သောက်တာပေါ့ မကြာပါဘူး တရုတ်အရက်ကို မောင်သက် အကုန်လုံးနီးပါး သူတစ်ယောက်ထဲ သောက်ပစ်လိုက်တာ ကောင်းတယ်ကွ ကောင်းတယ်ကွနဲ့ သောက်တာ အရက်ကလည်း ပူလိုက်တာဆိုတာ ချွေးတောင် ထွက်တယ်။ အဲဒါကုန်သွားတော့ မောင်သက်တို့ Gin ပုလင်းကို မျက်စောင်းထိုးရော လုပ်လေ ချတာပေါ့တဲ့ ကျွန်တော်လည်း အဲဒီ့တော့မှ အဖေပြောတာ သတိရတယ် မင်းတို့ လောက်မယ်မထင်ဘူးဆိုတာကို မောင်သက်ပါတယ် ဆိုကထဲက ကျွန်တော်သိသင့်တာပေါ့ မေ့သွားတာလေ။

ခုတော့ မောင်သက် ပြန်လာခါနီးလို့ ကျွန်တော် ဒီပို့စ်ကို ရေးပြီး ကိုယ့်ဘာသာ ပြန်နွှေးနေတာပါ။ ဒါပေမယ့် ခုနောက်ပိုင်း ဒီကောင် ပြန်လာရင် ကျွန်တော်တို့ထက် အချိန်ပေးရမယ့် သူကရှိနေတယ်။ ပြန်ရောက်ရင် ကျွန်တော်တို့ကို လှမ်းခေါ် ပြီးရင်တော့ သူ့ရဲ့ ချစ်လှစွာသော ချစ်ချစ်နဲ့ အချိန်တွေကို အသုံးချနေတော့တာပဲ။ ကျွန်တော်တို့က ဆဲရင် မင်းတို့ကလဲကွာ ငါမင်းတို့နဲ့လည်း နေပါတယ် ဘာညာဆိုပြီး ရုံးကို နေ့တ၀က်လောက်လာ ကျွန်တော်တို့ လစ်ရင် ပြန်ပြီးပြေး အဲ ညဘက် သောက်ချိန်ဆိုရင်တော့ ပုံမှန်ပဲ ဖုန်းဆက်ပြီး ဘာလုပ်မှာလဲ ဘာညာ ငါက မအားဘူးနော် ကြိုပြောဆိုပြီး ဖြစ်ရော။ အဲဒီ့တော့ ကျွန်တော်တို့က ဆဲ မလိုက်ချင်နေခဲ့ ဆိုတော့ လိုက်မှာပေါ့ဆိုပြီး ရောက်လာ သောက် ဟီး ဟီး ဟား ဟား လုပ်။ ကောင်မလေးက ဖုန်းဆက်ရင် ထပြော ပြန်ထိုင် သောက်။ သူ့ကောင်မလေးကလည်း ကျွန်တော်တို့နဲ့ သောက်နေရင်း ၁၅ မိနစ် တစ်ကြိမ်လောက် ဖုန်းဆက်နေတာ ကျွန်တော် မူးလာလို့ကတော့ ဖုန်းယူပြီး ပိတ်လိုက်တာပဲ။ အဲဒီ့လိုဆို ဒီကောင် ဘာမှမပြောဘူး ငါ့ကို ဖုန်းပြန်ပေးပါဆိုတာကို အာလေးလျှာလေးနဲ့ ပြော။ ကျန်တဲ့ကောင်တွေကပါ ဘာဖြစ်နေလဲ ငြိမ်ငြိမ်နေစမ်း ဆိုမှ ငြိမ်သွားတယ်။ ဒီကောင့်ကို ကျွန်တော် ခုနောက်ပိုင်း အရက်သောက်ခါနီး ပြောနေကျ စကားရှိတယ် ဖုန်းသောက်မှာလား အရက်သောက်မှာလားလို့။ ပြောလိုက်ရင် လဒက ဟဲ ဟဲ ဟဲ ဟဲ နဲ့ အရက်သောက်မှာပါကွလို့ ပြောပြီး ဖုန်းကတော့ ပြောတုန်း။ ကျွန်တော်တို့ကလည်း မနိုင်တော့ လွှတ်ထားပေါ့။ မူးလာရင်တော့ မရဘူး။ အပီအပြင်ကို ကောတော့တာ။ တစ်ယောက်နဲ့ တစ်ယောက် စိတ်ဆိုးတယ်လို့ မရှိပါဘူး။ အကြောင်းသိတွေကိုး။

မောင်သက်က ကျွန်တော့်ကို ခုအလုပ်လုပ်တဲ့ အထိကူညီတုန်းပါ။ ကျွန်တော်က မြန်မာပြည်ကနေ Hosting တွေ Domain တွေ Software တွေ ၀ယ်ဖို့ Online Banking မရှိတော့ သူက သူ့ရဲ့ Credit Card ကိုပေးသုံးတယ်လေ။ အဲဒါကြောင့်လည်း ကျွန်တော့် အလုပ်တွေ အဆင်ပြေနေတာပေါ့ ပိုက်ဆံက ဒီကောင်ပြန်လာရင် ပေးတယ် တခါတလေလည်း မပေးဖြစ်ဘူး။ ပေးပါလို့လည်း မပြောဘူး ဒီကောင်က ကျွန်တော်ကသာ သူ့ကို အားနာနေတာ သုံးထားတာ နည်းတာမှ မဟုတ်တာ။ မောင်သက်က စပြီးကျွန်တော်ကို တောင်းတာမရှိသလောက်ကို ရှားတယ် သူငွေပြတ်နေရင်တောင် ကျန်တဲ့သူကို ခဏလှည့်ခိုင်းတယ် ကျွန်တော့်ကို မပြောဘူး အကြွေးတောင်းသလို ဖြစ်မှာ စိုးလို့တဲ့ ကဲ အဲဒီ့လောက်ထိ ချစ်ဖို့ကောင်းတဲ့ကောင်။ ဒီကောင်က အခု မြန်မာပြည် ၆ လ၊ အမေရိကား ၆ လ နေနေတဲ့ကောင်လေ။ ဟိုရောက်လည်း ကျွန်တော်နဲ့က အဆက်အသွယ် မပြတ်ပါဘူး Gtalk နဲ့ ဆဲကြဆိုကြ နောက်ကြပြောင်ကြပေါ့။ ခုလည်း ပြန်လာတော့မယ်တဲ့ ၁၀ ရက်နေ့လောက်များ ပြန်ရောက်မလား မသိဘူး။ ဒီကောင်က ပြန်လာတိုင်း ကျွန်တော်နဲ့ ငသော့်အတွက် ပစ္စည်းတွေ တစ်ခုမဟုတ် တစ်ခု ယူလာတတ်သေးတယ်။ ဘောင်းဘီ၊ အင်္ကျီ၊ ပိုက်ဆံအိတ် စုံနေတာပါပဲ။ သူက ပြန်လာခါနီးတိုင်း မေးတတ်သေးတယ် ဘာလိုချင်သလဲတဲ့ ကျွန်တော်တို့က စိတ်ကူးပေါက်ရင်တော့ လိုချင်တာ မှာတယ် စိတ်ကူးမပေါက်ရင်တော့ မင်းဟာမင်း အဆင်ပြေတာ ၀ယ်ခဲ့လို့ပဲ ပြောလိုက်တယ်။ ခုလို သူ့အကြောင်းလေးကို ကောင်းတာလေးနဲ့ ပိတ်ပေးတော့ အဆဲခံရ သက်သာတာပေါ့လေ။ နောက်မှ ဒီကောင့်ရဲ့ အထုပ်တွေ ထပ်ပြီး ဖြည်ပြအုံးမယ်။ တော်သေးပြီး။